Gwamnatin Najeriya ta jajantawa Turkiyya
Ministar harkokin jin kai da kula da bala’o’i da ci gaban jama’a Hajiya Sadiya Umar Farouq ta jajanta wa gwamnatin kasar Turkiyya dangane da girgizar kasar da ta afku a baya bayan nan.
Umar Farouq, wanda ya kai ziyarar jaje ga jakadan Turkiyya a Najeriya Hidayet Bayraktar a madadin gwamnatin tarayya a ranar Juma’a, ya bayyana girgizar kasar da abin da ya biyo baya a matsayin mummunar barna.
Wata sanarwa da mataimaki na musamman kan harkokin yada labarai ga Farouq, Mrs Nneka Anibeze, ta rabawa manema labarai a Abuja ranar Juma’a ta bayyana hakan.
Da yake mayar da martani, Bayraktar, ya yabawa gwamnatin Najeriya da ministan bisa jajewarsu da suka yi, ya kuma yi addu’ar Allah Ya ci gaba da yin hadin gwiwa a tsakanin kasashen biyu.
Sanarwar ta bayyana cewa, wadanda ke cikin tawagar ministan sun hada da babban sakataren ma’aikatar jin kai, Dr Nasir Sani-Gwarzo, da daraktan ayyukan jin kai, Alhaji Ali Grema.
Sauran sun hada da Darakta Janar na Hukumar Ba da Agajin Gaggawa ta Kasa NEMA, Ahmed Mustapha Habib da mataimaki na musamman ga shugaban kasa kan harkokin jin kai, Shehu Sadique.
