Labarai

Wata Mata Mai Juna Biyu Ta Datse Mazakutar Mijinta Da Wuƙa A Taraba

Wata Mata Mai Juna Biyu Ta Datse Mazakutar Mijinta Da Wuƙa A Taraba.

Daga Aliyu Adamu Tsiga

Wata matar aure mai shekara 25 ta datse mazakutar mijin ta a garin Tella da ke ƙaramar hukumar Gassol na jihar Taraba.

Matar mai suna, Halima ta tafka wannan aika-aikan ne a ranar Talata yayin da mijin ta, Umar Aliyu ke sharar barci.

Ƙanin wanda abin ya faru da shi, Shagari Umar, ya ce ihun Aliyu ne ya jawo hankulan mutane inda suka zo suka tarar da shi kwance cikin jini.

Umar ya yi ikirarin cewa, “Mun ga matarsa Halima zaune a gefen gado riƙe da wuƙar da ta yi amfani da shi wurin datse mazakutar ɗan uwanmu.

Ya ƙara da cewa ƙiris ya rage fusattaun ƴan uwan Umar da maƙwabta suyi mata duka amma, “manya sun shiga tsakani sun ce a tausaya mata saboda tana ɗauke da juna biyu kuma suka kira ƴan sanda.

A cewarsa, an garzaya da Aliyu zuwa Cibiyar Lafiya ta Tarayya, FMC, da ke Jalingo mai nisar kilomita 150 daga garin Tella.

Ya ce, da isarsu asibitin, an bawa Aliyu kulawa cikin gaggawa aka tsayar da jinin da ke zuba daga raunin bayan an masa tiyata.

Likitan da ya kula da Aliyu, Dr Kyantiki Peter Adamu, ya shaidawa manema labarai cewa an kira shi sashin waɗanda ke buƙatar kula cikin gaggawa don wani majinyaci da aka kawo bayan datse masa mazakuta.

Abinda muka yi shine tsayar da zubar jinin cikin gaggawa da kuma yi masa tiyata a inda aka masa rauni saboda ya rasa jini sosai kafin a kawo shi,” in ji shi.

Ya ce bisa ga dukkan alamu majinyacin zai murmure amma yan uwansa sun buƙaci su tafi da shi saboda haka babu abinda asibitin zai yi a kai.

Shagari ya shaidawa manema labarai cewa cewa sun ɗauke Aliyu daga FMC Jalingo ne domin su tafi da shi wani asibiti a Gombe.

Mun ɗauke ɗan uwan mu daga FMC Jalingo mun tafi da shi FMC Gombe domin ya ƙara samun kulawar da ya ke buƙata, in ji Shagari.

Kakakin rundunar ƴan sandan jihar, DSP David Misal ya tabbatar da afkuwar lamarin, ya ƙara da cewa ƴan sanda sum kama Halima sun kuma fara binciken dalilin faruwar lamarin.

Related Articles

Leave a Reply

Your email address will not be published.

Back to top button